Rambasse – syt 25 Joor

Mir Rambasse si s erscht Mool 1987 z Prattele uf d Pischte.
Als Mitglieder vo de Buurelümmel isch s en Idee gsi, au z Prattele aktiv an dr Fasnacht mit z mache. Us deren Idee gits das Joor dr 25. Ufftritt vo de Rambasse z Prattele.

S Hauptproblem am Aafang isch gsi, dass mir beidi (dr Leadsänger und dr Dichter) musikalisch unterentwicklet si. So hei mer denn non e Musiker chönne für die Idee begeischtere. Will dem si musikalischs Talent nit viel höcher gsi isch, si mer im erschte Joor mit er e gmietete Dreihorgele uf d Pischte. Das hett aber sini Tücke gha, will mir d Clique-Chäller nit hei chönne eben ynefahre. S Joor druff hett er ys denn mit em e sälber baschtlete Gloggespiel begleitet. Mit synere Virtuosität hett er drmit scho mol e schwächere Värs chönne rette.
Nach 10 Joor hett e neue Musiker d Glöggli übernoh. Au er hett si Talent voll zur Gältig brocht. Leider isch er denn unerwartet früh gstorbe. Das isch denn au s Endi vo de Glöggli-Aera gsi. Sit acht Joor werde mer von er e Musikere am Oergeli begleitet.

Als Bänggler sett me aktuell si – au mit „Last-minit-Värs“. Me gseht aber au, dass sich gwüssi Sujet wiederhole, zum Byschpiel bi dr Mode. Dr folgendi Värs, wo mer 1992 gsunge hei, isch hütt wieder top aktuell:

Bi dene Leggins find ich denn guet
Wie dr Stoff uff dr Huut sitze duet
Jetz cha me dene holde Wäse
Fascht alles vo de Lippe läse